Sarphan Uzunoğlu
Zaf rey karê rojnamegerî de stres, saetê dergî yê xebate û qezenco kêm vejîyeno ver. Zaf cigêrayîşan de, mîyanê mezunanê lisansî de tewr tay grûba rojnamegeran tewr tay qezenc kena. Ma zenê ke zaf rojnamegerî roja ma ya ewroyîne de karê xo yê rojnamegerî ra remenê, caverdenê. Gelo êyê ke newe bîyê rojnameger û êyê ke nika karê xo rê dewam kenê motîvasyonê înan çi yo?
Gelo çi ra rojnamegerî karê xo rê dewam kenê? Nê şertanê zehmetinan de çi çî rojnamegeran motîve keno? Gregory Perreault û Claudia Mellado "Rojnamegerî de Keyfweşîye" ser o cigêrayîş kerdê û kewtê peyê na perse dima.
Rojnamegerî de keyfweşîye: Roşnîya rojanê zehmetinan
Xebata Perreault û Mellado de aşkere bîyo ke karê rojnamegerîye de zî zaf sebebê keyfweşîye estê. Goreyê cigêrayîşî, mabênê merdiman de dîyalog û şarî rê xizmetkerdiş rojnamegeran keyfweş keno. Rojnamegerî pêvînayîş, goşdarîkerdişê hîkayeyan û meseleyan ser o cîgêrayîş kerdiş ra tehm gênê. Sey nimune; Yew rojnamegero ke cigêrayîş de ca girewto vato “Eke ti behsê hîkayeya yewî/e bikî to ra bawer kenê. Eke ti zî layîqê na bawerîye bî, ti pê keyfweş benê,” û bi no qayde karê xo ra keyf gêno.
Senî venga keyfîye dîyeno?
Rojnamegerê ke cigêrayîş de ca girewtê, keyfweşîye sey hîso ke merdim veyneno ci terîf kenê. Parekerdişê hîkayeyanê însanan, komelî rê xizmet kerdiş û hêzê zanayîşî xebitnayîş mojneno ke rojnmegerî senî karê xo de tesîrin ê.
Sey nimune, behskerdişê hîkayeyêka mehelî, behskerdişê meseleya ke mîyanê komelî de êdî vînî bîya, motîvasyonêko pîl dano rojnamegeran. Yew rojnamegere zî vana; Gama ke ez xebera ke qedînaya ra dima zaf keyfweş bena. Eke ez hevalanê xo dir pare bika hîna zaf pê şa bena .
Bingehê keyweşîye: Têkîlîya bi şarê reyde
Goreyê cigêrayîşî rojnamegerê ke şarî reyde kewenê mîyanê têkilîyeû goşdarîkerdişê hîkayeyan ra şa benê. Rojnamegerî bi no qayde xo erzenê herinda îsanan û empatî kenê. Bi no qayde meslegê xo ra hîna zaf hes kenê. yew rojnameger zî vano; “Hîkayeyî mi însanan rê kenê nêzdî. No zî karê mi keno weş û bi mana.”
Netîce : Rojnamegerîye de keyfweşî, bingehê xopêhesyayîşî yo
Cigêrayîşê Perreault û Mellado, karê rojnamegerîye de keyfweşîye tena yew hîs nîya eynî wextî de demanê zehmetinan de semedê dewamkerdişê karê rojnamegerîye bingehê xopêhesyayîşî yo. Bi na keyfweşîye rojnamegerî motîve benê û şarî reyde têkilîyanê hîna weşan nanê ro.
Rojnamegerîye tena viraştişê xebere nîya. Rojnamegerîye de potansiîyelê bedilnayîşî esta. Rojnamegerî eşkenê semedê ximetkerdişê şarî keyfweşîye sey bingehê motîvasyonî bixebitnê.
Çimeyê nuşteyî: Newslab Turkey
Tirkî ra açarnayîşê Zazakî; Enwer Yılmaz
