Nuşteyê kurdî yê ke qezaya Xarpêtî Dep (Karakoçan) de ameybî esteritiş newe ra ameyê nuştiş
Qezaya Depî ya Xarpêtî de hetê şaredarîya DEM Partî ra rayîran ser o nuşteyê hîşyarî yê trafîkî yê Kurdî "Verî Peya" û "Hêdî/Hêdî" ameybî nuştiş.
Labelê nuşteyê Kurdî hetê kesê ke nênê zanayîş ra ameyî esteritiş.
Parlamenterê Çewlîgî yê Partiya DEM Partî Omer Faruk Hulakû û heyeta ke ey dir bî ewro newe ra rayîr ser o nuşteyê Kurdî nuştî.
Hulakû va, “Kurdî ziwano tewr qedîm ê nê erdan o, nêno çînekerdiş! Ma ewro tîya newe ra nuşteyê Kurdî rayîr ser o nuştî. Ma na bêtehûmlîya ke ziwanê ma rê bena qebûl nêkenê. Estbîyayîşê Kurdan do bi xoverdayîşê şarê ma dewam biko. Ê çiqas ziwanê ma rê hêriş bikê, ma do hende ziwanê xo rê wayîr vejîyê.”
Çimeyê Xebere: Çewlik.Net
