Serekê Pêroyî yê CHPyî Ozgur Ozelî Dîyarbekir de va: "Dewlete nêeşkena qerar bido ke problemê Kurdan esto yan çino. Kurdî bi xo qerar danê."
Serekê Pêroyî yê CHPyî Ozgur Ozelî dest bi gêrayîşê xo yê Dîyarbekirî kerd û 30 parlamenteranê partîya xo ya pîya Diyarbekir de yo.
Ozgur Ozelî çarçewaya zîyaretê xo de, verê cû endamanê dezgeyanê komelê sivilî yê cinîyan reyde arayî kerd û dima ra yew beyanat da.
Ozelî va: "Vizêr mi va, ez dewlete teklîfê Kurdan kena. Ez Kurdan rê teklîf kena ke bibê wayîrê Cumhurîyetê Tirkîya, dewleta ke tede seyyewbîyayîş esta û xo tede bê cîyakarî hîs bikerê."
" Tirkîya de 26 mîlyon Kurdî estê "
Ozelî derheqê vengdayîşê Serekê Pêroyî yê MHPyî Devlet Bahçelî yo derheqê Ocalanî de zî wina va: "CHP her game ke seba qedîyayîşê “terorî” û seba aşitî muhîm vînena. Ma paştî danê gamanê seba aşitî.”
Îddîanameyê kiştişê Narîn Gurane
Ozelî derheqê îddîanameyê kiştişê Narîn Gurane de zî qisey kerd va: "Îddîaname de nêno vatene ke kamî cinayet kerdo. Sebebê nê kiştişî îddîaname de çin o. Kamî a gedeya 8 serrî çi ra kişt nêno behs kerdene. Tim wazenê ke çîyê ke ma nêzanê komelî rê nêvajê. Nê welatî de silametîya her kesî girêdayeyê sîyasetê demokratîkê sivilî ya. Na nuqta de ma do her çî bikerê."
