Wezîrê Karê Zereyî yê Tirkîya Alî Yerlîkayayî da zanayîş ke Tirkîya de 4 mîlyon û 164 hezar û 472 koçberê xerîbî bi hawayêko qanûnî manenê.
Yerlîkayayî eşkere kerd ke înan ra 2 mîlyon û 920 hezar û 119 kesî şarê Sûrîye yê.
Rijîyayîşê rejîmê Beşar Esedî yê Sûrîye ra dima, rojevê Tirkîya de agêrayîşê koçberanê Sûrîye esto.
Alî Yerlîkayayî yew programê televîzyonî de da zanayîş ke 15 rojê peyênan de hûmara koçberanê ke agêrenê gore, deman ra verê 7 qatî zêde bîya û zêdeyê 25 hezar şarê Sûrîye agêrayo welatê xo.
Yerlîkayayî va, "Nika Tirkîya de 4 mîlyon û 164 hezar û 472 koçberê xerîbî bi hawayêko qanûnî manenê ke înan ra 2 mîlyon û 920 hezar û 119 kesî şarê Sûrîye yê ke binê pawitişê muweqetî de yê.
Serra 2017î ra nat 763 hezar û 443 Sûrîyeyî bi waştişê xo agêrayê welatê xo."
Yerlîkayayî eşkere kerd ke Sûrîyeyîyê ke agêrenê welatê xo eşkenê hemê hacetanê xo yê keye û dikan û otomobîlanê xo berê.
