Enwer Yılmaz

Weçînayîşê 31ê Adare yê 2024î yê Şaredarîyan rê wextêko tay mendo.

Weçînayîşê Melehî semedê Demokrasî nîşaneyêko hol ê. Tabî semedê şaran, şaristanijan, dewijan û taxijan tena weçînayîş yan zî weçînitişê temsîlkarêk tena bes nîyo. Kesê ke yenê weçînayîş, gere heta peynîya weçînayîşî zelal bê, hesab bidê raydayoxanê xo, mîyanê şarî de cîyayî nêkerê.

Yanê nêvajê “Şima desteg nêda mi. Ez şima rê xizmet nêkena.” Gere mîyanê cimatî de wayîrê kesanê dezavantajinan vejîyê û semedê înan projeyan hadre bikê.

Xizmetê Beledîyeyan tena viraştişê rayîr, binêsazî, îmar û ûsb çî nîyê. Îdrekerî gere goş bidê waştişanê şarî ser û tengîya şarî de kişta şarî de vinderê. Yanê gere bibê dostê roja tenge…

Eke ma bêrê şaristananê ke şarê ma tede cuyeno gere xizmetê ke şar wazeno ê xizmetî bêrê dayîş.

Şarê ma mîyanê sîndoranê Tirkîya de cuyeno û bindest o. Hem hetê madî hem hetê rehetîye ra zaf pey de yo. Şarê ma ser o polîtîkayê asîmîlasyonî estê û ziwan û kulturê ma roj bi roj helîyeno. Eke ziwan û kulturê şarêkî çîne bibo o şar vîndî beno şino. Xora şarî bi ziwan, nasname û kulturê xo şar ê.

Çîyo ke ez qest kena şima zê fehm kerd ez texmîn kena. Yanê Şaredarîyê mintiqaya ma gere wayîrê ziwan, kultur û nasnameyê şarî vejîyê. No zaf çîyo zehmetin nîyo. Sey verî vera xizmetkerdişê ziwan û kulturî astengîyê pîlî çîn ê. Tabî astengî û asîmîlasyon dewam keno. La tay bo zî serbestîyêke esta. Merdim gere nê îmkanan goreyê lazimtîyan bixebitno.  

Her çî ra ver namzedê partîyan ganî bieşkê ziwanê Kurdkî qisey bikê û sîyasetê xo zî bi Kurdkî (Zazakî-Kurmanckî) bikê. Xizmeto ke şaredarî dana şarî, personelî gere bieşkê Kurdkî qisey bikê û gere bikê zî.

Her mehla de eşkîyeno dersa Kurdî bêra dayîş. Eşkîyeno hetê Kulturî ra tewir tewir aktîvîteyî bêrê kerdiş.

Kesê ke xebata ziwanî kenî gere wayîrê înan zî bêro vejyayîş ke wa xebata ziwanî bêra teşwîqkerdiş.

Tewir tewir xizmetê şarîdarîyan estê ke şarê ma taleb keno. Înan ra yew zî şima zî zanê nameyê dewe, qeza û zaf cayanê ma nika bedilyayo û bîyo tirkî. Şaredarî eşkenê ê nameyan peyser bidê ê cayan.

La mi gore çîyo acîl û gere bêro kerdiş xelisyayîşê ziwanê ma yo, xebatê ziwanî, hunerî û kulturî yê bi Kurdkî yo. Gere şarê ma zî namzedan ra nê waştişê xo îzah biko. Eke ma dewaya şarî kenî her çî ra ver nê xebatî gere ca de bêrê kerdiş.

A bîne zî ma gere qalê êyê ke hetê qayûman ra bi neheqî gureye xo ra ameyê eştiş zî bike. Nê merdimî bi serrano ke mîyanê zehmetî de cuya xo rê dewam kenê. Hukmat bîlasebeb ê Şaredarîyan ra vetî. Nê însanî însanê welatperwer ê. Her çîra ver gere peyser ageyrê karê xo ser.