ZAZAKÎ NEWS - Çarçewa cipersayîşê derheqê Şaredarîya Bajarê Girdî ya Îstanbulî de derheqê 105 kesan de qerarê tepiştişî ame dayîş.
Serekê Şaredarîya Bajarê Girdî ya Îstanbulî Ekrem Îmamoglu zî na çarçewa de ame tepiştiş.
Serekê Şaredarîya Şişlî Resul Emrah Şahan, şêwirmendê Îmamoglu yê çapemenîye Murat Ongun û rojnameger Îsmaîl Saymaz zî ameyî tepiştiş.
Hetêko bîn ra, îstasyonê metroyê Taksîmî zî bi qerarê Walîtîya Îstanbulî ame girewtiş û do seferî nêrê kerdiş.
Îmamoglu: Ez wazena şima bizanê ke ez sere nêtewnena
Îmamoglu verî ke bêro tepiştiş yew vîdeo vila kerd û va:
"Komêk aqilan ke wazenê îradeya şarê ma dagir bikerê, polîsanê ma yê delalan seba xirabîye xebitnenê û bi seyan polîsî ardê tîya.
Ez wazena şima bizanê ke ez sere nêtewnena.
Ez şima ra hes kena û xo emanetê şarê xo kena. Wa her kes bizano, ez do linganê xo ser o vindî."
“Serekê rêxistine yo”
Serdozgerîya Komare ya Îstanbulî zî seba Serekê Şaredarîya Bajarê Girdî ya Îstanbulî Ekrem Îmamoglu îfadeya "Serekê rêxistina sûcan Ekrem Îmamoglu" xebitnaya.
Serdozgerîye eşkera kerd ke, cipersayîş hetê "Buroyê Cigêrayîşê Sûcanê Rêxistinî" ra yeno ramnayîş.
Seba Îmamoglu ameyo vatene ke o "serekê rêxistinî" yo û ame îdîakerdene ke na rêxistin "karsazan ra pere daya arê. Bi hawayêko neheq qezenc qenê, kesanê sexteyan dir tîcaret kenê”
