Heyeta Merkezê Rayberîye yê DEM Partî seba ke Şaredarîya Colemêrgî rê qeyûm ame tayînkerdiş kombîyayîş kerd. Serekwekîla Koma Meclîsî ya DEM Partî Gulîstan Kiliç Koçyigit derheqê kombîyayîşî de kombîyayîşê çapemenîye kerd.
Gulîstane Kiliç Koçyigit qirarê tayînkerdişê qeyûmî sey qirarêkê sîyasî name kerd û va: ''Îqtîdar bi darbeyê vera demokrasîyî sûcê girdî keno. No îqtîdar çi wext biwazo weçînayîş keno, çi wext biwazo qeyûman tayîn keno. Îqtîdaro wînasî Tirkîya îdare keno. La îqtîdar hesabê yew çîyî nêkeno, no şar xoverdayox o, milê xo çewt nêkeno. Şarê kurdî weçînayîşan de qeyûmî ritî eştî çopan. Şarê ma senî ke Wan de vera xespêkerdişê îradeyî warişt payan ser do nika zî warzo payan ser."
Koçyiğit aşkere kerd ke înan qerar girewt ke do verê heme şaredarîyanê xo de çalakîyanê nobete bîdê destpêkerdiş û wîna dewam kerd: " Ma veng danê heme şarê xo, rêxistinanê komelê sîvîlî û her kesê wayîrê wîjdanî ke wa paştî bidê çalakîyanê ma.''
Çi bibi?
Weçînayîşanê 31ê adare de namzedê DEM Partî Mehmet Siddil Akiş bibi hemşaredarê Colemêrgî. Labelê Akiş serê sibayî Wan de ame destbendkerdene. Dima şaredarîye gêrîyaye binê ablûqa.
Wezîrîya Karanê Zereyî pare kerd ke Şaredarîya Colemêrgî ya DEM Partî rê qeyûm ameyo tayînkerdiş. Wezîrîye va ke, bi îdîayanê 'endamî, propaganda û îdarekarîya rêxistine' derheqê Akişî de dosyayê dewa estê.
Derheqê Akişî de bi îdîaya 'endamîya rêxistine' tehqîqatêko newe zî ame akerdene.
Qeyûm ame tayînkerdene
Walîyê Colemêrgî Alî Çelîk zî sey qeyûm ame tayînkerdene.
Avûkatê Akişî Azad Onerî derheqê rewşa muwekîlê xo de va: ''Dosya ser o qirarê nimitişî est o. Tehqîqat 'bi hawayêko nimite' yeno kerdene. Eşkera yo dozgerîye û hêzanê asayîşî pîya dosya amade kerda.''
