Mihemed Kurdî
Enê rocan Bakûrê Kurdistanî şewat û vejyayîşê adiranê zaf pîlan ra ri bi ri maneno, enê adirî ra ver desan kesî cuya xwu vîndî kerdê, bi hezaran donim hêgayî vêşayî û reyna bi hezaran heywan û gandarî merdî.
Bi taybet zî eno hewte beyntarê Mêrdîn û Amed de adirêko zaf pîl vejîyayo, eno adir hema zî zaf cayan de nêtefênayo. Gama ke enê adiro pîl vejîyayo û kewto hêgayan, demêk badê cû zî resa keye û dewan. Seba ke adir reyde vayêko zaf bihêz zî ameyêne qontrol kerdişê adirî mumkun nêbîyo, coka adirî wexto ke rew de zaf hêga û birr vêşna û kerd wele. Her çiqas ke şarê ma yê mintiqayî cehd kerd ke bi îmkanênê xwu adir hewna bikero la çi heyfo ke nêeşkayê. Aye semed ra şar seba ke hetkarîya înan nêkerdo gerre hikumetî ra kenê û vanê ke hikumetî ma bêwayir veradayê. Reyna şarê mintiqayî vano ke, ma sere de vat, eke helîkopter nêbo eno adiro pîl nîno tefênayîş la çi heyfo ke kesî goşdarîya ma nêkerd, îmkanê şaredariye zî qîmî tefênayişê adirî nêkerd û netîce de bi desan ganê ma şî. Bêgûman eke hetkarî biameyêne kerdene do xisarê ma zî hende zaf nêbîyene la hetkarî roca binê gama ke adir tefêya çend heb helîkopterî ameyî wina asmên de çend tûr eştî û şîyî.
Sedemê Vejîyayişê Adirî Çî Yo?
Enê adirê xedare xwu reyde minaqeşeyî zî ardî, çimkî herkes semedê vejîyayişê adirî perseno la yew zî nêvano qisûrê ma est o. Rayedarê hikûmetî û walîyê enê wirdî şaristanan (Mêrdîn û Amed) bê ke cêgariyîş bikî û goştarîya şarê mintiqayê bikê vatê ke, adir rîyê vaşanê huşkan ra vejîyayo. Hetê bînî ra şarê ma yê mintiqayî zî vano, zafaneyî tirafoyên elektirîkî tiraviste/xerabîye yo, ma bi çimanê xwu dî ke qabloyê înan ra adir vejîyeno. Aye semed ra seba ke tirafo û qabloyî cû bênê viraştiş û newekerdiş ma çend rey Dedaş hişyar kerd la kes goşê xwu nêdanê hişyarî û vatişênê ma. La rayedarê dewletî herinda ke heqê şarî bipawo û hetê înan de ca bigîrê, ser o de zî seba vejîyayişê adirî şarî sûcdar kenê û Dedaşî ra zî yew qal nêvanê. Eno Dedaşo ke hikumet sey çimê xwu paweno hertim şarê ma ceza keno, bi taybetî enê seranê peyênan de Dedaş bîyo belayê sereyê şarê ma û gonîya ma şimeno, enê germê hamnanî de deşta Mêrdînî de bi seatan ma bê enerjî verdano, hikumet zî seba ke Dedaş şarê Kurd hol ceza keno hertim hetê Dedaşî gino.
Raşta ci eke dewlete û hikumeta tirkîya Kurdan sey hemwelatiyê bivînêyene çi rey şar wina bê derfet veranêdayêne çimkî ma bi çimanê xwu vînenê gama ke adirêko qij zî şaristananê tirkan de vejîyêne dewlete bi heme hêz û helîkopter û teyareyanê xwu hetê înan kena la Kurdan rê zî vana semedê mercê hewayî ma nêeşkenê hetê şima bikerê. Seke şima zî zanenê di serrî verê cû Yewnanistanî de adirêko pîl vejîya o çax tirkîya înan rê helîkopter şirawîtî, reyna hikumet, şar û saziyê tirkî bi şew û roc qala Fîlîstînijan kenê û înan rê ardim şirawenê la gama ke ê ke merdî Kurd ê çewî ra sewt nê vejîyeno.
Gelo Enê Şewat û Adirî Tesaduf ê?
Enê şewat û adirê ke ewro Kurdistanî û heme xozaya ci vêşneno, yo verên nîyo, xwura bi serrano Kurdistan de hêga û xoza, dar û birr, nebat û heywanî, xezalî û zerencî, war û bîstanî, kerra û zinar yenê veşnayene. Yanê enê polîtîkayê talankerdiş û qirkerdişê Kurdistanî yê û enê polîtîkayî hema zî her wareyî de dewam kenê. Nika zî û verê cû zî zaf rayan daristanî mintiqayê sey Dêrsim, Botan, Mêrdîn, Licê û Colemêrgî ameyê vêşnayene, o çax sazî û dezgeyên ke waştîşêne adirî bitefînê rayir înan hetê dewlete ra ameyê birnayîş/tepiştiş û misade nêame kerdiş ke şar adirî bitefêno. Vêşnayîşê xozaya daristanan zî polîtîkayêko qirkerdişê welatê ma yo. Coka enê adirê ke welatê ma vêşneno tesadûf nîyo. Aye semed ra ganî şarê ma hayîdar bo û erd û hêgayê xwu bipawo.
Helbet vêşnayişê vaşanê huşkan zî beno sedema vejîyayişê adiran, la seke ma cor de zî vato vêşnayîşê xozaya Kurdistanê yew polîtîkayêko sîstematîk o ke bi seran dewam keno.
Ganî şarê ma yê erjaye baş bizano, kes û destê ke hêga û birrê Rojavayê Kurdistanî vêşnenê kam bê yê ke Bakurî Kurdistanî zî vêşnenê eynî yê. Xwura rêveberiya xoser a Rojavayê Kurdistanî zî verê cû zaf rayan seba vêşnayîşê birr û hêgayan tirkiya sûcdar kerdibî. Reyna sey şima zî zanenê enê demên pêynî de Başûrê Kurdistanî de zî çend adirê pîl vejîyayo, ena ray beno destê ke bazaranê Başûrî Kurdistanê vêşneno zî eynî dest bê, çimkî duşmen, estbîyayişê Kurd û Kurdistanî xwura sey gef vîneno.
Kam ke Kurdan, ziwan û îradeya Kurdan, estbîyayiş û kulturê Kurdan nêşinasneno ê erd û birr û xozaya Kurdan vêşnenê. La wa her kes baş bizano eno adirê ke ewro welatê ma Kurdan vêşneno do rocêkê duşmenanê ma zî bivêşno.
24.06.2024 / Mêrdîn
E-maîl. [email protected]
