Komîteya Festîvala Xoza û Kulturî ya Munzurî programê Festîvala Munzurî aşkere kerd.
Festîvala Kultur û Xoza ya Munzurî ya 21. emser mabênê 2-6ê tebaxe de do bêra kerdene. Federasyonê Komeleyan ê Dêrsimî (DEDEF) bi eşkerayîyêka çapemenîye bernameyê Festîvala Kultur û Xoza ya Munzurî ya 21. eşkera kerd.
DEDEFî venga pêro dêrsimijan û dostanê înan da ke bêrê festîvale .
Endamê Heyetê Rayberdişî yê DEDEFî Ulaş Yegînî eşkerayîye wende. Yegînî îzah kerd ke 2yê tebaxe de bi aktîvîteya kultur û bawerî yê Duzgun Babayî startê festîvale do bêro dayene. Yegînî vist vîrî ke Festîvala Munzurî 23 serrî verî vera talanê xoza, polîtîkaya bêmerdimverdayîşî û sermaye dîyabî destpêkerdene. 23 serrî yo ê vera HES, ocaxanê madenan, awbendan û hêrişanê sermaye û dewlete xo ver danê.
Yegînî da zanayene ke bernameyê festîvale de muzîk, panelê serê ekolojî, tîyatro, sînema û kargehê domanan est ê. Yegînî vat: ''Festîvala Munzurî xîretê wayîrvejîyayîşê ziwan, tarîx, kultur û bawerîya ma yo. Ma venga pêro dêrsimijan û dostanê înan danê ke tewrê na festîvale bibê.''
Serekê Beledîyaya Dêrsimî Fatîh Mehmet Maçoğluyî va, “Ma semedê Festîvale muracatê xo kerdo. Ma do emser Festîvale virazê. Wa Festîval nika ra xêyrîn bo ”
