Dêrsim de bi wesîleya serrgêra qirkerdişê 1938î vizêr programê vîrardişî ame viraştiş. Semedê Seyîd Rizayî û hevalanê ey 40 leyekî ameyî ronayîş.
Dewa Axdatî ya qezaya Pulurî ya Dêrsimî de bi wesîleya serrgêra qirkerdişê 4ê
gulane programê vîrardişî ame organîzekerdene.
Komeleyê Elewîyan ê Demokratîkan (DAD), DEM Partî, Şaredarîya Dêrsimî, Komeleya Kulturî ya Pîr Sultan Abdalî (PSAKD) û merdime Seyîd Rizayî beşdarê vîrardişî bîyî. Vîrardiş de semedê şehîdan 40 leyekî ameyî ronayene.
Vîrardiş de kesê ke qirkerdiş me ameyî qetilkerdene ameyî vîrardene û çêraxî ameyî tafînayene.
Hemsereka Pêroyî ya DADî Kadriye Dogan Seyîd Riza û rayhevalê ey bi hurmetî yad kerdî.
Hemserekê Pêroyî yê DADî Zeynel Kete zî vat: “Wayîrbîyayîşê yew mezarî, wayîrbîyayîşê yew mekanî, wayîrbîyayîşê yew kultur û tarîxî yo. Coka mezelê pîrê ma û cananê ma êyê ke sey ey rayîrê heqîqetî de ver bi heqî rayra şîyênî çîn kerdî.”
Serekê Şubeyê PSAKDyî yê Dêrsimî Ekber Kayayî zî vat 1937-1938 de nizdê 70 hezar kesan ameyî qetilkerdene. Dewlete wa ozrê xo biwazo. Wa cayê mezelan berê eşkerakerdene."
DEM Partî ra Yuksel Mutlu zî 4ê Gulane sey " Roja sîyaye " name kerd û vat: “Vera roja sîyaye doman û tornê Seyîd Rizayî têkoşînî rayra benê. Vera xirabîya birêxistene ganî ma zî têkoşîn û xoverdayîşê birêxistene rayra berê.”
Hemşaredara Dêrsimî Birsene Orhan zî vat: “Na herre de bi hezaran erjî bêkefen ameyî definkerdene. Ma do hesabê nê qirkerdişan bipersê.”
