Badê 100 serran reya verêne vera Pîyaameyîşê Lozanî dewa ameya akerdiş û ameyo waştiş ke wa Pîyaameyîşê Lozanî betal bibo.
2 avukatê kurdî Hişyar Özalp û Rıdvan Dalmışî namê Kurdanê Dîaspora (DIAKURD) ser semedê betalkerdişê Pîyaameyîşê Lozanî vera Tirkîya dewa kerd.
Muracatê betalkerdişê Pîyaameyîşê Lozanî seserrîya Pîyaameyîşê Lozanî de ame kerdene . Avukatê kurdî bi nê muracatî wazenê wa Kurdî bi xo qederê xo tayîn bikerê.
Avukatan semedê hetkarî û paştîdayîşî zî vengdayîş kerd û îzah kerd ke, eger mehkemeyanê Tirkîya ra encamêk nêgêrê ê do Komîteya Heqanê Merdiman a Neteweya Yewbîyayî (NY) rê muracat bikerê.
24ê Temmuza 2023î temambîyayîşê seserrîya Pîyaameyîşê Lozanî ya. Pîyaameyîşê Lozanî, 24ê Temmuza 1923î de ameyo îmzakerdiş û Kurdistan mabênê çar dewletan da ame parekerdiş.
