Şêx Seîdî 13ê Sibata 1925î de qezaya Pîranî ya Amedî de vera hukmatê ê wextî xoverrodayîş da dest pêkerdiş.
Rayberanê Kurdan ra Şêx Seîd bi fermanê Mehkemeya Îstîklalî pa 46 hevalanê xo 29ê Hezarîna 1925î de Dîyarbekir de amebi îdamkerdiş.
Semedê yadkerdişê Şêx Seîdî û 46 hevalanê ey ewro Dîyarbekir de çend programê vîrardişî estbî.
Partîya Welatparêzanê Kurdistanî (PWK) semedê serrgêra îdamkerdişê Şêx Seîd û embazanê ey a 99ine semînerêk da.
Vervatoxê PWKyî Hanîfî Tûranî moderatorîya semînerî kerd.
Cigêrayox Kerem Serhedî û Hetkarê Serekê Pêroyî yê PWKyî Mehmet Can Azbay semîner de qisey kerdî.
Roşinvîr, endam û temsîlkarê PWK, PSK, HAK-PAR, DDKDyî beşdarê semînerî bîyî.
“Şêx Seîd û hevalanê xo vera zilmî serehewenay”
Komela Şêx Seîdî zî Dîyarbekir de cayê komele de beyanatêk da û behsê serehewanayîşê Şêx Seîdî û hevalanê ey kerd:
Beyanat de wîna vajîya;
“Ewro serrgêra şehadetê şehîdê Kurdistanî Şêx Seîd û hevalanê ey a. Înan semedê welatê xo ganê xo feda kerd. Şêx Seîd û rayhevalanê ey semedê dewa, heq, azadî û rûmetê miletê Kurd, bi cesaretêko pîl xebate û micadele kerdê. Micadeleyê înan, serehewanayîşê înan vera zilm û neheqî bi."
Kesê ke ameybî komele badê zî şîyê verê Edlîyeya Dîyarbekirî û uca de zî beyanatêk dayî. Beyanat, her dicayan de hetê serekê Komela Şêx Seîdî Firat Kasimî ra ame wendiş.
DEM Partî ra zî beyanat
Hemserekê DEM Partî Tuncer Bakırhanî hesanê xo yê Xî ser ra beyanatê vila kerd û wîna va;
99 serrî verê cû Şêx Seîd û 46 hevalê ey bi qerarê Mehkemeya Îstîklalî ameyê qetilkerdiş. Ma Şêx Seîd û hevalanê ey bi hurmet û bi minet yad kenê. Ma tornê Şêx Seîdê kal ê. Heta azadî û sxelasî ma do micadeleyê înan bidomnê.
Enwer Yılmaz / Zazakî News
