Her çiqas hetê hukmatî ra mektebanê mîyanênan de heqê dersa weçînite dîyaya zî zaf cayn de hem astengî estê hem zî muhameleyo keyfî esto.
Ame zanayîş ke wendekarê Îmam Hatîpî Dîyarbekir û Çewlîg de nêeşkenê sinifanê 5,6 û 7ine de dersa weçînite ya Zazakî weçînê.
Goreyê malumatê ke kewtê destê Zazakî Newsî, zaf mekteban de formê dersa weçînite de Zazakî ca nêgirewta.
Xususî Mektebanê Îmam Hatîbî de tena sinifa 8ine de ca dîyayo dersa weçînite ya Zazakî.
Sinifanê 5,6 û 7ine de çînebîyayîşê Zazakî bîyê sebebê reaksîyonê mamostayanê Kurdkî zî.
Çend rojî verê cû zî aşkere bibi ke, Mudirîya Perwerdeyî ya Mîllî ( MEB) tay forman de ca nêdayo modulê Zazakî. Semedo ke mîyanê Dersa Kurdkî de Kirmanckî/Zazakî ca nêgênê îdareyê mekteban nêeşkenê kîtabanê derse yê Zazakî biwazê û nêeşkenê hûmara ê kesanê ke Zazakî weçînayê tespît bikê.
Mamosteyê Dersa Zazakî Mehmet Şah Aslan Zazakî Newsî ra vano ke; " Semedê dersa weçînite ya Kurdkî kampanyayî yenê viraştiş. La çîyo ecêb gedeyê ma nêeşkenê sinifanê 5, 6, û 7 de dersa Zazakî weçînê. Xora gedeyê ke şinê sinifa heştine îmtîhanê LGSyî dir mijul ê. NLa hayîya zaf kesan naye ra çin a. Vajîyeno ke prosesê dersa weçînite heta 19ê Sibate ameyo dergkerdiş. No zî raşt nîyo. Mekteban rê nê derheqî de nuşteyêk nêşirawîyayo."
Zazakî News /Bilhüda Doğan Çit
