Wextêkê dergî ra dima Gruba Xebate ya Vateyî reyna bi keyepelê xo, dinyaya dîjîtale de cayê xo girewt.
Keyepelê Vateyî newe ra ameyo dîzaynkerdene û tede arşîvêko pîl esto ke şima eşkenê ci ra îstîfade bikê.
Seke yeno zanayîş na grube seba standardîzasyonê ziwanê ma zazakî/kirmanckî/kirdkî/dimilî xebitîyena û 1996 ra nat ge welat de ge teberê welatî de kombîyayîşanê xo virazena.
Nê kombîyayîşan de her hetê welatî ra cigêrayox û zanayê ziwanê ma yenê têhet, seba ziwanê nuştekî çekuyan û gramerê ziwanê ma ser o xebitîyenê. Badê ke emsar kombîyayîşê 36î qedîya, grube keyepelê xo îlan kerd. No keyepel do seba wendox û musaxoyan bibo kanalê tekilîya grube. Goreyê edîtoranê keyepelî, keyepel do roj bi roj aver şêro û seba ziwanê ma mecreya dîjîtale de bibo çimeyêkê ziwanê ma.
