Serekê Beledîyeya Baxlarî yo verên yê AK Partî Huseyîn Beyoğlu ame tepiştiş. Goreyoke vajîyeno serê ey de pereyêko pîl ameyo vînayîş.
Serekê Beledîyeya Baxlarî yo verên yê AK Partî Huseyîn Beyoğlu par bi îdîaya ruşwet girewto, bêusulîye kerdo ra amebi tepiştiş, labelê badê cû amebi veradayîş. Nika newe ra pa 14 merdimanê xo ame tepiştiş.
Ame musayîş ke, dest ronîyayo mal û milkê Huseyîn Beyoğlu û 14 merdimanê ey ser zî.
Goreyo ke ame zanayîş, 14 kesê ke dest ronîyayo mal-milkê înan ser ê zî demê Beyoğluyî de Beledîyeya Baxlarî de şuxulîyêne, înan sey şebeke pereyê Beledîye diznayê. Serekê înan zî Huseyîn Beyoğlu bîyo.
Ame tepiştiş, dest ronîya malê ey ser û veradîya!
Ewro ê 14 kesî û Beyoğlu hetê polîsan ra ameyê tepiştiş. Polîsan dest nayo meteryalanê dijitalan, gelek pere, dolar û zerdanê înan ser. Vajîya ke nê kesan ser de demonceyî zî vejîyayê.
Badê 14 kesî hetê mehkema ra ameyî veradayîş labelê dest nîya mal û milkê înan ser. Bi belgeyan aşkere bîyo ke înan malê beledîye diznayo.
Beyoğluyî guya soz dabi ke do ximet biko!
31ê Adare 2019î de semedê Beledîyeya Baxlarî weçînayîş amebi kerdiş. O wext HDP se ra 71 rayî girewtbî û Beledîye qezenc kerdbî. Labê semedo ke dewaya namzedê HDP estbî Beledîye destê înan ra amey girewtiş û teslîmê namzedê AK Partî Hüseyin Beyoğlu bîy. Semedo ke Beyoğlu weçînayîş de bibi dîyîn mazbata dîya ey.
Wexto ke Huseyîn Beyoğlu ame weçînayîş, soz dabi ke o do Baxlar biko cayêko modern, miletê ucayî rê banan virazo, feqîrîye biqedîno û bibo xizmetkarê şarî.
Labele badê cû vejîya werte ke Huseyîn beyoğluyî ximetêk nêkerdo, merdimê xo dekerdê mîyanê Beledîye û pa ê merdimanê xo îhaleyî rotî û mutehîtan ra pereyî girewtî.
Enwer Yılmaz / Zazakî News
